ജീപ്പിലെ പരസ്യങ്ങൾ ചർച്ചയാകുമ്പോൾ
ജീപ്പ് ബ്രാൻഡിന്റെ ഉടമസ്ഥരായ സ്റ്റെല്ലാൻറിസ്, വാഹനങ്ങൾ നിർത്തിയിട്ടിരിക്കുന്ന സമയത്ത് പരസ്യങ്ങൾ പ്രദർശിപ്പിക്കുന്ന സംവിധാനം അവതരിപ്പിക്കാൻ തയ്യാറെടുക്കുന്നുവെന്ന് റിപ്പോർട്ടുകൾ വ്യക്തമാക്കുന്നു. വരുമാനം വർധിപ്പിക്കാനുള്ള ഈ തന്ത്രം ഉപഭോക്താക്കളിൽ സുരക്ഷാ മുന്നറിയിപ്പുകളും സ്വകാര്യത സംബന്ധിച്ച ആശങ്കകളും ഉണർത്തിയിരിക്കുകയാണ്.
പരസ്യങ്ങളുടെ കടന്നുവരവ് ഡ്രൈവിങ്ങിൽ ഡ്രൈവറുടെ ശ്രദ്ധതിരിക്കാൻ സാധ്യതയുണ്ട്. ഒരു നിമിഷത്തെ അശ്രദ്ധ പോലും വാഹനാപകടങ്ങൾക്കും സുരക്ഷാപ്രശ്‌നങ്ങൾക്കും ഇടയാക്കാം. ഇതിന്റെ ഉത്തരവാദിത്തം വാഹന നിർമ്മാതാക്കളോ സോഫ്റ്റ്‌വെയർ കമ്പനികളോ ഏറ്റെടുക്കേണ്ടിവരുമെന്നതും ചർച്ചാവിഷയമാണ്.
സുരക്ഷാപ്രശ്‌നങ്ങൾക്ക് പുറമെ, ഉപഭോക്താക്കളുടെ സ്വകാര്യതയെ ബാധിക്കാവുന്ന വിഷയങ്ങളും ചർച്ചയിൽ ശ്രദ്ധേയമാണ്. പരസ്യങ്ങൾ കൂടുതൽ വ്യക്തിവത്ക്കരിക്കാൻ വാഹന ഉപയോക്താക്കളുടെ ഡ്രൈവിംഗ് ശീലങ്ങളും ലൊക്കേഷനുകളും സംബന്ധിച്ച ഡാറ്റ ശേഖരിക്കപ്പെടാനിടയുണ്ട്. ഈ വിവരങ്ങൾ പരസ്യദാതാക്കളുമായോ മറ്റ് സേവനദാതാക്കളുമായോ പങ്കിടപ്പെടുമെന്നതിൽ സംശയമില്ല. കൂടാതെ, സൈബർ ആക്രമണങ്ങൾക്കും വഴിയൊരുക്കും.
ഇതിനുപുറമേ, സ്മാർട്ട് ടെലിവിഷനുകളിലും സ്ട്രീമിംഗ് പ്ലാറ്റ്‌ഫോമുകളിലും കണ്ടുവരുന്ന ട്രെൻഡനുസരിച്ച്, പരസ്യങ്ങൾ ഒഴിവാക്കാൻ ഉപയോക്താക്കൾക്ക് പ്രീമിയം അടക്കേണ്ട സാഹചര്യം വന്നേക്കാം. ഉപയോക്തൃ അവകാശലംഘനങ്ങൾ കോർപ്പറേറ്റുകൾക്കിടയിലെ ധാർമ്മിക ചർച്ചകൾക്കും വഴിവെക്കുന്നു.
ഈ പുതിയ സാങ്കേതികവിദ്യ സംബന്ധിച്ചുള്ള അന്തിമ തീരുമാനങ്ങൾ സർക്കാർ അധികൃതർ ഉൾപ്പെടെയുള്ള വിവിധ ഏജൻസികൾ പരിശോധിക്കേണ്ടതുണ്ട്. വാഹന നിർമാണ കമ്പനികൾ ഉപയോക്തൃ സുരക്ഷക്കും സ്വകാര്യതക്കും മുൻഗണന നൽകുകതന്നെവേണം. അതിനാൽ, ബന്ധപ്പെട്ട അതോറിറ്റികൾ നിരീക്ഷണം ശക്തമാക്കുകയും നിയമപരമായ മാർഗനിർദ്ദേശങ്ങൾ കർശനമാക്കുകയും ചെയ്യേണ്ടതുണ്ട്.
